Awe 15 Desèmber 2009 ta un dia ku mi ta rekòrdá ku hopi goso. Dikon? Pasobra ta e dia ku Dios a uni nos famia ku Su Amor pa kumpli ku Su boluntat. Mi no ta kansa di gradisí Dios pa tur e kosnan ku E a, ta i lo sigui hasi pami i mi famia. E dushi ta ku e momentu ta yega ku Señor ta duna bo tur loke E a pone pabo risibí, basta bo pone E komo prioridat den bo bida. Mi a yega di lesa ku matrimonio ta “Sirbi Kristu Huntu”, wel esey ta un bendishon ku mi por papia di dje. Na momentu ku bo por hasi esey huntu, bendishonnan ta sigui kai manera awaseru. Nos Dios ta un Dios Mizèrikordioso i ke duna nos tur loke E tin. Pero loke E ta pidi ta pa nos entregá nos mes na djE, pa e por husa nos komo intrumento pa bendishoná otro. Hasiendo hopi fayo den mi bida i mirando tur mi bendishonan (despues di tur e fayonan, repentí i pidi Dios pordon) Dios ta mustra mi tur dia di nobo kwantu E ta stima mi. Mi ta pidi Dios Tata Todopoderoso pa e dekorá mi kurason mas ahinda ku amabilidat i humildat pa sirbi tambe mi prohimo. Amèn.

Inusha Curiel-Capriles