Amor ta mas importante ku tur don 

Awor mi ta bai mustra boso loke ta surpasá tur kos.

Ounke mi por a papia tur lenga ku hende sa papia, asta lenga di angelnan, pero mi no tin amor, mi no ta nada mas ku un gòn ku ta resoná òf un bèl ku ta zona pa loko. Maske mi tin don di profesia, mi konosé tur Dios su sekretonan i mi sa tur kos, maske mi tin fe perfekto pa move seru, ma mi no tin amor, mi no ta nada. Maske mi parti tur loke mi tin pa alimentá pobernan i asta entregá mi kurpa pa mi broma ku esei, ma mi no tin amor, no ta yuda mi ku nada.

Amor sa di soportá i ta bondadoso, e no ta envidioso; amor no sa broma, ni ta orguyoso. E no ta grosero, ni egoista; e no sa rabia lihé, ni warda renkor; e no ta keda kontentu ku inhustisia, pero ku bèrdat sí. Amor semper ta perseverá, semper ta kere, semper ta spera i keda soportá.

Amor ta dura pa semper. E dia lo yega ku hende lo no profetisá mas, ni papia den lenga i don di konosementu lo no eksisti mas. Pasobra don di konosementu i don di profesia ta kosnan limitá, ku lo yega na nan fin ora loke ta perfekto bini.

Tempu mi tabata mucha, mi tabata papia manera mucha, pensa manera mucha i rasoná manera mucha; pero dia mi a bira hende grandi, mi a laga loke ta di mucha mi tras. Awor akí nos ta mira via un spil, no direktamente, pero e dia ei nos lo mira direktamente. Awor akí mi konosementu ta limitá, pero e dia ei lo mi tin konosementu kompleto manera Dios konosé mi kompletamente. Mientrastantu tres kos ta keda: fe, speransa i amor; pero esun di mas grandi ta amor.

– 1 Korintionan 12:13b – 13:13